謝賢果然好戲

捧了“終身成就奬”的謝賢，八十四歲了，仍然大鋪戲癮。他説，這是畢生的職業，年輕時有戲就拍，要養全家。合作女星無數，四歲到七十四歲都有，最記得的女星是誰？“以前，屋企阿爺、阿嫲及八兄弟姐妹都係靠我養。”謝賢説：“誰叫到都拍，不是好有錢，有收入啦。(曾合作的女演員有多少個？)記不清楚啦。(嘉玲、蕭芳芳、陳寶珠、南紅、江雪、汪明荃、李司棋？最紅的都與你合作過……）眞係唔記得，拍完再見，會問你係邊個，哈哈。”

相隔六十年，在《殺出個黃昏》中再度合作的馮寶寶又如何？四哥笑言：“我都唔記得佢個樣，但見到時又識喎……太多嘢在個腦裡面。”

記得女兒婷婷嗎？”四哥笑道：“婷婷更加唔記得啦！”

型爆的謝賢，與女人拍的床上戲，最經典是亞視的《情陷夜中環》。繾綣床上，四哥仍然戴上墨鏡。“嗰次唔知點解，可能個女仔唔係好靚啩。（係張文慈！）我眞係唔知佢而家個樣，太耐冇見，唔記得咗。拍戲咁多，個個女主角都記得咩，眞係唔記得。”

對手女主角數之不盡，還有《殺》片的孫女鍾雪瑩，劇情激到他爆粗。四哥質疑，是否要對一個少不更事的女孩子講粗口？拍了兩個版本，最終選擇了有粗口的版本。四哥表示，自己講得好自然，太入戲了，講了也不知道。

平生與無數靚女拍的對手戲，都忘記了；今次演一個落寞老人，面對餘年，頗令人動容。林家棟看好謝賢來屆金像獎爭做影帝！謝賢笑說：“唔係嘛？眞係？”林家棟笑他扮謙虛。“咁就眞係好，可能佢畀咗藥我食。”謝賢澄清，今次出山，並非監製林家棟口氹到他，而係自己“落叠”。他又說：“如果感覺唔對路，我會即走，我做咗演員咁耐，呃我唔到。”

寶刀猶堅的謝賢，可想攞最佳男主角獎？他笑言：“如果邊個攞，我就打邊個，邊個敢攞？”但同期上畫對撼的，實力旗鼓相當，來者正是謝霆鋒。

高 梁