何華麟大師兄首出

練者謝偉豪上季同劉永康合作緊密，拍檔搵到啖食，騎者亦視謝廄為主要策騎基地。季初此雙組合憑“天行大師”開齋，及後再贏“德輝興旺”，此後兩人再無頭馬交出。但豪廄在十二月及一月勝出四W，卻無一由劉永康主轡，全由高君濤一手包辦。劉永康在豪廄似失去主帥地位，未知騎練是否拆檔，近日惹來圈中人猜測。筆者日前同謝偉豪傾過偈，練者表示同劉永康仍屬好拍檔，只是有些馬順應馬主要求，易配高君濤搏殺。加上現階段部分馬匹須減分，故近期出擊馬不多，致劉永康座騎有限，此子唯有尋找外線馬出戰。

今季從練的何華麟在港澳馬圈富人脈關係，今季開倉獲馬主支持，廄內暫有十駒。馬口不算多，稍後續有新馬加盟，屆時馬房實力增強，對日後爭分有莫大幫助。練者開倉後亦埋頭苦幹，待戰駒操好才上陣。周六首度出馬，全日一駒貴精不貴多，值得關注。

第六場四班千二米，旗下“大師兄”由余健雄執韁已有搏殺手影。此匹四歲澳洲馬外地用得不多，跑五場獲三亞一季，雖未贏馬但上名率不差。來澳後由十月操到今，論馬具作戰水準。今次操足派上征途，馬房擺明要打有把握仗。“大師兄”近日加強磨練，周二余健雄親自快試，走來火力俱佳，可及鋒而試。此駒今仗身處四班應有微利，遇同場對手不多，冀替馬房打響頭炮。