英超開鑼 波衫大晒冷

餓波逾兩個月的球迷終等到新一季英超開鑼，球迷除咗睇好波和留意愛隊，當然唔少得關注新季的各隊波衫。英超球隊的新季球衣有唔少嘅變化，衛冕的曼城新主場球衣向其名宿比爾致敬，設計源自一九六七至七一年四連霸時經典球衣設計，隊徽置於前胸中間，領圈及袖口以過去主場常用的酒紅色條紋點綴，領口內側更有“The King”標誌。作客球衣則用上紅黑斜紋，紀念一九六九年球隊首次使用紅黑斜紋球衣。

將再次挑戰曼城地位的利物浦主場球衣用上簡潔設計，按傳統保留YNMA字樣，而“96”的火焰標記由今季起改為“97”，紀念希斯堡慘案增至九十七人。今季作客則換上白色配大理石紋暗花。

曼聯新季主場球衣沿用紅色外，與Adidas自一五年合作以來首次使用Polo恤領口，重演經典，並加上以球隊“M”字演變的幾何圖案，衫身加入細條紋設計。相隔七年後，作客球衣再以純白色打造，領口加入黑紅雙色條紋。而阿仙奴、車路士及熱刺的新季主場球衣沿用傳統的紅色、藍色及白色。

除英超Big 6外，不少球隊的作客球衣均值得留意，有別傳統主場球衣的設計，另類亦受不少球迷追捧。