博採衆長成泰斗

無厘頭“星”曾一度橫掃影壇，然此“聲”不同彼“星”。佢絕對有厘頭，細時叫佢“老爺”，大時反叫“聲仔”；縱橫藝壇七十餘載，擇善固執，推廣劇藝嘔心瀝血，扶掖後進，毋計得失，人稱“粵劇泰斗”。

林家聲，人生傳奇。生於香港，父乃大埔火車站長。日治時期學校強制教日文，佢抗拒唔學，寧輟學入戲行。十歲闖蕩梨園，食百家飯，得衆家長。所有功夫，都乃“偷”來者。佢逢戲必看，係戲棚老鼠。

因天資聰穎，青葱之年已能掌板。某日大老倌五哥薛覺先家設戲局，為妻慶生，獨缺掌板。五嬸隨手拉出聲爺，舉座愕然。其時聲哥雖未見經傳，卻定過抬油，板眼無缺。一曲既罷，梨園響垛，薛老五即收為入室弟子。

聲哥斯文靚仔，早係銀壇超級小生，逢片必賣；戲行之中，唔嫖唔賭，不酒不煙，乃梨園極品。處世為人，正道之極，與妻紅荳子一貫以終，乃緋聞絕緣體。

聲哥享壽八十二，今日係佢九十齡冥壽。

西門公子