昨日賽事總投注二百五十二萬

高君濤摩氏父子起孖

昨天草地賽事完結。是仗戲碼不弱，五場總投注額共二百五十二萬五千元。

頭場六班混戰爆冷開始。王君適廄“英記好友”交張志立主轡，後上挫敵。此駒已久無頭馬進帳，連仗表現平平無奇。今次六班混戰遇弱旅，騎者出閘順利跟前，沿途且戰且走，入直路展開衝剌，埋門一湧而上，影相以鼻位險勝對手，九倍獨贏打破處女馬“半畝彩虹”開齋美夢。“英記好友”沉寂多時生氣重現，替馬房取得久違頭馬，張志立、王君適攜手開勝門。

第二場馮耀正廄“祥駒”由徐錦輝主轡再下一城。練者頭場博失“半畝彩虹”後揮軍再拼，“祥駒”挾上次贏完氣勢出擊，今次被捧成兩倍熱門。騎者出閘應聲彈出，沿途守住內欄推進，入直路發力彈甩對手悉先衝線。“祥駒”連仗愈戰愈勇，人馬打疊取兩捷，表現水準穩定。馮耀正頭場“半畝彩虹”飲恨第二，幸“祥駒”贏馬補中執番個彩。

第三場高君濤再贏摩廄“赤飛龍”。此駒上次初出即勝，早熟馬表現悅目，質新分子今次打鐵乘熱再來，臨場成一面倒大熱。騎者出閘搶放，沿途拍實快馬“飲就兄弟”鬥放，結果入直路甩開對手順利得勝。高君濤、摩利高齊添進帳。

第四場高君濤起孖。此子贏完“赤飛龍”乘勝追擊，是場騎劉志森“國金星球”，以強橫後勁退敵。此駒連季未開餬，今季由賀廄轉投劉志森廄重新操養。上仗同程後追不及只得第三，今次原裝人馬捲土重來。騎者出閘守最尾，入直路發力衝剌，埋門一攻而破，贏來從容不迫，替馬匹取得來澳首W。劉志森贏馬交代，高君濤梅開二度。

尾場蔡義武贏馬、摩利高起孖。騎者上次替摩廄“夠響照贏”主轡，跑入位置。今次原裝配搭再來，憑一檔地利起步貼欄而走，沿途小心翼翼，入直路展開强勁衝剌，將對手一網成擒。“夠響照贏”轉倉後喜獲首捷，摩氏父子合組倉首仗起孖兼省招牌。