絕地翻羽表現走樣 旗袍皇后爛地發威

上周六草地日賽打水戰，全日仍有熱門馬勝出，賽果未算太亂籠。蔡鎮威馬房“協會八號”上仗跑爛地賽前未知是否適應，結果贏來兵不血刃，跑完獨贏成大熱只得兩倍，令人始料不及，相信是幕後信心十足所致。澳馬彩池細易受影響，馬匹臨場被捧成大熱，應不是普羅馬迷的注碼。

因爛地關係不少馬匹表現走樣，同贏馬時比較判若兩駒，陳俊輝馬房“絕地翻羽”前兩仗爛地大勝對手成條街，賽後有說此馬爛地“識飛”，上仗卻舉步唯艱，全程跑來無段好睇，敗於“旗袍皇后”二十五個馬位。以一匹贏過爛地當勇馬而言，實在令人難以相信，日後“絕地翻羽”跑爛地須重新估計。同場同廄馬“旗袍皇后”是仗出閘快放，三扒兩撥帶頭，全程一放到底，贏來從容不迫，屬今季最漂亮一仗。此駒去年四月分贏後再無進帳，期間連敗多場，每次總是有前無後。“旗袍皇后”爛地打反擊戰，除因馬匹適應場地外，日將中野省吾亦懂得執生，事關跑爛地出閘搶得先機，馬匹擺在前面走可減少意外，此子騎來亦夠機靈。唯“旗袍皇后”乃低班分子，贏後加分已無優勢，下次不宜追捧。