協會七號擺明再搏

澳馬跑埋今次，本月剩番兩次賽事。踏入季尾騎師冠軍之爭形勢趨明朗，高君濤現以十四W拋開余健雄，今季重登冠軍寶座是指日可待。高君濤近期手風旺，每次皆有進帳，今日五駒在手，仍堪重視。另路人馬田中正一亦宜留意，此子騎足六場，睇環境有頭馬見面。

田中正一來澳客串多月，頭馬數字續扳升，迄有八W在手，成績不俗。此子騎功未算一級，但搏殺尚交得準，效力各廄表現賣力。賀蘭杜夫今仗邀其做殺手，全日五駒供騎者出擊，馬迷可吼緊。

第一場：四班一三五○米。“烈火戰駒”來澳多仗還未贏過，雖謂守齋馬，但沙草皆宜。此駒連敗減分，今仗回師曾入位途程肯定可應付。此駒四歲質新當打，賽前操足應戰。改配田中正一主轡配搭亦完整，憑路合檔佳，隨時一網打盡。

第五場：二三班千八米。“協會七號”上仗千五米贏來猶有未盡，田中正一騎來發揮水準，馬匹亦大幅進步，人馬令人憧憬。此駒能跟能鬥，今番匆匆而來擺明再搏，續交田中正一掛帥，遇同組對手無多，力足再下一城。

第六場：五六班千二米。“興測”連仗無功，拚後小休重新操磨，試閘走勢進展良多，論馬可及鋒而試。均速馬後上力強，今番由田中正一操刀有備而戰。此駒質新未見底，遇上同組對手不穩分子居多，形勢大好，拚盡可食尾餬。