昨賽事總投注逾四百萬

高君濤中三元收穫豐

昨天沙草混合賽完成。是仗天晴地好，角逐過程順利。六場賽事總投注四百○七萬五千元。

頭場沙戰大熱W旗開得勝。高君濤騎摩利高廄“浩勝精綵”，以輕鬆姿態挫敵。此駒上次安萬堯跑一五一○米只得第三未竟全功，今次縮程換將，用高君濤再拼。騎者接手出擊搏盡，埋門勇奪頭馬。跑完獨贏只派十四蚊，買中者得啖笑。“浩勝精綵”贏馬開齋，騎、練攜手先拔頭籌。

第二場陳俊輝廄“飛龍寶”開齋。此駒季內屢拼不出頭，上次由中野省吾跑同程落敗。今次於五、六班混合賽恃磅輕兼排一檔好位，出閘快步搶先，全程貼欄頂死高君濤大熱門“追鷹”，順利帶返贏馬。“飛龍寶”質素不高，今次遇上馬少場合贏形勢，下次再來不宜追寶尾。陳俊輝贏馬交代，中野省吾居功不小。

第三場高君濤搏殺起孖。此子騎錢廄“好友福”，以凌厲後勁擒敵。此駒季内高君濤主轡屢有戰功，唯近期無沾手。上次劉永康出戰落敗，今次重配高君濤出擊，人馬贏來悅目，替錢廄建一功。“好友福”今季轉倉後表現脫胎換骨，練者交到功課。高君濤喜中兩元，成績至佳。

第四場何華麟爆冷贏馮廄“滿貫福星”。此駒季內連戰連敗減分已多。上次用高君濤跑沙地點滴全無，輸至脱節純粹試馬。敗後回師草地千五米，換上嫡系何華麟操刀突然變身，九倍半冷將對手一網打盡。馮耀正喜添頭馬，騎者亦居功。

第五場高君濤中三元。此子於一、三場起孖氣勢正盛。是場騎賀廄“賞櫻”，以輕鬆姿態取勝。上次此雙人馬跑至無影。今次增程至千八米，又得一檔好位相助，贏來無懈可擊，替馬房添進帳。高君濤是日三元收穫，一枝獨秀。

尾場黎昌全爆冷贏譚廐“力奇寶寶”。此雙人馬上次跑沙地，力拚第二未贏馬。今次唞過再來，原裝配搭回師草地起家路。騎者把握機會，替馬匹勝回一仗。跑完獨贏有十一倍分頭不俗。譚文就喜添頭馬。黎昌全食尾餬埋齋。