雷有輝婉拒出唱碟

雷有輝日前接受TVB娛樂新聞台節目主播許文軒專訪，大談戒煙對唱歌的影響。

他說：“我已戒煙五年，可以話百利而無一害，體能、外表、皮膚同精神都好好，食嘢仲好味咗，搞到更加為食。戒煙初期肥咗十磅，因為食到真味道。（對唱歌方面係咪好咗？） 唱歌時舒服咗好多，唞氣感覺比之前好得多，依家大力吸一口氣唔會有阻滯，條氣順好多，唔會唱吓唱吓又咳。”

一直有擔任和音工作的雷有輝，被問做和音與做歌手的感覺？他說：“兩者感覺好唔同，不過兩樣都好享受。以前曾經有試音機會，亦可以與其他歌手推出雜錦唱片，不過最終婉拒了黃柏高。”他又說：“其實我係因為哥哥雷有曜才接觸和音。讀書時，有次佢病了，我代佢去錄和音。但當時我唔識睇譜，仲叫幫我錄音的周啟生唱一次畀我聽。好彩首歌容易記，又畀我過到關，自此就開始我做主音的生涯。”