威盡百年伊士曼

“伊士曼七彩”，叔父話當年，電影片頭例牌有此標示。此乃彩色電影最高水平之作，只要有伊士曼，色彩艷麗，肯定好嘢。中外影史上不少大片猛片，皆以伊士曼彩色膠片攝製。

伊士曼，美國發明家，冇讀幾年書，卻發明乾式底片，令攝影易過借火。佢生產“博士”傻瓜機，以其按下快門之聲，取名“柯達”，影相話咁易。佢有口號曰：“你掣，我幫你搞掂。”柯達菲林由此揚名。

未幾，佢將底片接龍成串，發明電影膠卷。加之佢老鄉愛迪生發明電影攝影機，如此天作之合，尤其之後伊士曼發明的彩色膠片，雄霸電影拍攝近百年。當年拍片唔用伊士曼彩色，即係唔夠班。

一百卅二年前今日，柯達正式註冊商標，領先全球近百年，伊士曼亦豬籠入水。惜世界輪流轉，自數碼攝影興起，柯達一沉不起，自行滅亡。伊士曼則早於八十八年前因癌患折磨，飲彈自盡。

西門公子