周柏豪與陳詠謙分享寫歌心得

周柏豪與陳詠謙日前接受J2音樂訪談節目專訪，分享他們合作多年的心得。陳詠謙大爆兩人之間最有淚水的一件事：“有段時間我被人批評，柏豪會表明立場支持我；佢支持我又會令到有好多人批評佢，佢好偉大！因為佢冇需要幫我擋子彈，仲要冇話畀我知，其他人同我講返，我才知佢做咗呢件事。”

兩人自一一年開始合作，陳詠謙說：“當時我好新，仲要幫周柏豪寫兩張唱片的歌詞。我就好大壓力，佢就好多憂慮，因為希望幫佢在音樂上建立一個更鮮明的風格。”柏豪說：“填詞人同歌手的關係是要通過試探去互相認識對方，佢試過成功挑戰我的底線，好似《黑》的歌詞提到妓女同私生子，放在一個咁陽光的男歌手身上係好大膽的，但係我好鍾意。”

柏豪在節目中亦談到寫歌給其他歌手：“我首先要知歌手有咩要求，例如唱咩Key會舒服，跟住我會在琴上貼好多唔同顏色貼紙。”陳詠謙取笑他說：“每個琴鍵咪都有人名？係病態喎！即係呢粒音係容祖兒、呢粒音係陳柏宇。”柏豪笑說：“搣得走的！我寫《到此為止》時就問連詩雅，點解佢咁想寫一首歌？佢最後寫咗封信，呢封信係畀佢想寫畀啲人。我睇完之後就明白晒，一個禮拜後我寫好隻歌，佢好鍾意，但冇諗過呢首歌之後會唔會Hit。容祖兒唱《天窗》後拎埋金曲金獎，我開心係因為自己的創作令到首歌成功，有得咗的感覺。”