勝利皇星開鑼先鋒

新季定於九月十九日開鑼。馬場晨操已復課，各廄為備戰新季來臨及早做工夫。錢健明廄戰駒積極打磨，旗下“皇庭之寶”是首匹作快跳的馬，試來腳步嫌重，唞暑後未夠狀態。“皇庭之寶”前季爭打吡，因搏得多且加分不少，故上季無甚表現。今季評分下調，應有反彈能力，待馬房重新做工夫後，馬匹作戰水準應有所提升。

錢健明屬年輕一輩練馬師，開倉後成績不斷提升，前季以五十二W摘冠。惟贏完冠軍後，上季成績同前季差一大截。究其原因，是馬匹用得多評分高企，普遍要減分回氣。加上部分新馬適應環境需時，青黃不接情況下只取二十八W，排名龍虎榜第四位，尚算不俗。“錢仔”騎師出身，做練馬師後力求上進，除用人得宜，撚馬亦有一手。廄內“好友福”上季四捷，由五班贏到上二班，令人刮目相看。此駒愈跑愈長，現千五至千八米最佳出路，新季續可替馬房爭功。廄友“常山虎”同取四捷，由六十六分贏至過百分，現躋身一班亦毫不輸蝕。此駒沙草皆宜，千二米最為首本，乃馬房重要取分棋子。此外“勝利皇星”錢廄接手後取兩勝兩位，替馬房省招牌。此駒上季多拚評分調高，賽至季末表現回落，唞暑後休養生息。“勝利皇星”馬齡漸長落腳轉慢，現跑中距離較合適，經回氣後，新季又可用得着。據悉，本月十九日開鑼賽“勝利皇星”報跑一二班一五一○米，練者早為此駒做好準備，屆時開鑼賽作先頭部隊出擊。