強勁充沛打響頭炮

新馬季於周六開鑼，各路人馬賽前磨刀霍霍，準備賽日搏殺。練馬師錢健明昨午同馬主及圈中人在馬房拜神，祈求新季諸事順利，捷報頻傳。錢廄上季只取二十八W，成績比前季下滑。但馬匹經過上季休整，不少已回氣減分，新季料可派用場。錢廄首仗派八駒應戰，精兵列陣，擺明要攞頭彩。錢廄今季兵力有增無減，倉口現擁逾三十駒，實力依然強盛。周二派遣逾十駒試閘，廄主全朝吼到實，部分戰駒已具作戰狀態，開鑼賽上陣者必搏盡求逞。

第一場六班一五一○米。“強勁充沛”上季尾連番拼搏未能出頭，最叻一役高君濤操刀跑千八米得第二。該仗敗於“東海新星”腳下，人馬表現仍佳。及後原裝配搭再戰無功而回，連敗兩場主要是負重磅較吃力。馬匹唞暑後復課重新打磨，周二由高君濤試閘，跑來步大力雄，狀態冒勇。今仗續由高君濤主轡，配搭依然強勁。此駒上季只跑過一次沙地，該仗短途賽擺明路短，不足為據。此番增程至一五一○米應不同估計。周內晨操，騎者親自主試“強勁充沛”，今次做足工夫再戰，開鑼賽要拼盡為止，憑冠軍騎師當旺氣勢，冀替馬匹開齋兼打響頭炮。