昨開鑼賽總投注近三百萬

六練六騎新季開餬

昨天新馬季開鑼，六場沙地賽順利完結。開跑前會方一如以往，由高層人士率領各部門員工在場內拜神，祈求新季事事順利，人馬平安。

開鑼賽總投注二百九十萬三千元。

頭場六班跑一五一○米。兆廄“柏雪三寶”閘前退出，只得十一駒角逐。林凱騎陳俊輝廄“豪情駿馬”大熱掄元。此駒上季煞科戰無功而回，唞暑後今次開鑼賽決心出撃，臨場捧成大熱門。結果出閘一放到底，人馬打開勝利之門。同場“飲水思源”跑入連贏，派彩只得二十九文，中者得啖笑。林凱、陳俊輝打響頭炮。

第二場張志立騎兆廄“柏雪之寶”打開勝利門。此駒上季尾同程落敗。拼後經休養生息，今次落班出戰遇弱旅。騎者出閘搶放，全程自造步速，一氣呵成直帶而返，贏得新季首場勝利。張志立、張兆煊攜手響頭炮。

第三場安萬堯、馮耀正攜手開齋。馮廄旗下“滿貫福星”上季尾由何華麟贏完，至煞科日易配林凱出戰千八米落敗。經唞暑後再來，今次轉戰沙地交由安萬堯主轡成冷門。騎者出閘留後，全程且戰且走，入直路發力如飛殺上，埋門輕取對手，替馬匹取得新季首W。

第四場高君濤開餬。此子騎摩利高廄“運動名將”出閘快放，全程咬貼前領馬“鑽飾月光”。走至埋門兩駒拍實纏鬥，終點前挫敗對手，替馬贏得新季漂亮一仗。高君濤丶摩利高打響頭炮。

第五場陳卓鋒騎適廄“愛神之駒”爆冷開齋。此駒上季敗後小休，今次新季首戰跑沙地，換上陳卓鋒主轡冷至二十一倍。出閘跟住尾三四位，入末彎前突然加速搶放，拍實前領馬“寶寶”直奔終點，結果以短距離挫敗對手，爆出全日冷W。適廄新季開餬，陳卓鋒亦打響頭炮。

尾場田中正一爆十倍冷W食尾餬。此子騎錢廄“櫻花路”以強勁衝刺挫敵。此駒上季草地千二米起家，新季首戰轉跑沙地，改配田中正一操刀。騎者交到功課，替馬匹新季開齋。騎丶練攜手食尾餬。