金槍紅下次可開齋

長勝勇士撚得返生

澳馬場今季騎師人手同上季一樣，華洋師傅共十六人，個別騎者因停賽無緣上陣。恩利克連仗高掛免戰牌，此子本周刑滿復出可參戰。今季跑過兩次賽事，多位華人騎師已開齋，余健雄上次三元進帳躍升榜首，此子新季有個好開始，季內倘能保持戰意，或可圓冠軍騎師夢。“冷門一族”林凱、劉永康及陳卓鋒均已打開勝門，各人可放下心理包袱。練馬師現時前五位者同取兩W，馮耀正亞、季馬較多暫居榜首，此廄戰意如虹，新季積極搶攻，日後不失為馬迷捧場對象。

謝貴全、何鑑森聯廄上仗憑“金槍紅”及“長勝勇士”跑入亞軍，新季未能開齋，但馬房肯拼，距贏馬之期應不遠矣。謝貴全、何鑑森前季合組孖倉，共取三十七W成績標青，但由於戰駒搏得盡，上季大部分要減分，故只取十四W，成績回落。今季不少馬已回氣，質新分子成熟躍起，季內料可派用場。上仗“金槍紅”首戰拼得亞軍，埋門屈居“滿貫藍寶”超班馬腳下，雖敗不辱。“金槍紅”潛力未盡，沙地特佳，上季顆拍黎昌全開齋一役表現悅目，經上次熱身仗後，下次原配重來可開齋。

“長勝勇士”上季尾兩戰皆入連贏，久沉馬表現復甦。上次新季首戰得亞軍，演出仍有水準。此駒全盛期居一班毫不輸蝕，唯馬齡漸長無復當年勇，現時評分調至四十分區域，身處四班肯定着數，況且七歲未算太老。

何鑑森練馬逾二十年，部署出擊富經驗，馬匹搏殺要打有把握仗，“長勝勇士”撚得返生，季內會有頭馬見面。