喜晉配強值得吼緊

開季後華人倉口排名一直領先。陳俊輝暫兩W居次席，開鑼後兩戰均有頭馬見面。練者積極搶攻看來是着意爭分。唯目前只是季初，各路人馬還有一段漫長日子拚鬥，但馬房能早着先鞭取得佳績亦好事。

陳俊輝部署出擊向來有其辦法，用人方面則不拘一格，華洋騎師俱有交易，最緊要聽話及交到功課。上季所贏二十四場頭馬，頗多是由高君濤搏殺取得。上季廄內“承讓”多番拚搏無法出頭，季尾交由高君濤主轡終於贏馬。由此反映，騎練合作有默契。高君濤乃冠軍人物，本身騎功好且交得準，接手難騎之駒出戰，往往有意想不到效果，故受練者及馬主青睞。周六上演六場沙地日賽，俊廄有馬交高君濤操刀，馬迷宜另眼相看。

第二場四班一三五○米，“喜晉”上季尾連番闖入位置，表現四平八穩。此駒唞暑後重新打磨，開鑼日派上戰陣交黎昌全操刀，臨場成三十倍大冷，由賠率反映信心不足。騎者出閘搶放，走至直路無以繼，最終跑回第六。但敗未脫節，觀走勢似熱身居多。經上仗試馬再來，今仗強配高君濤主轡乃搏殺先兆。

“喜晉”質新未用盡，沙地同程起家，五歲馬今季成熟勇進，料有更佳表現，周六配強出擊，值得吼緊。