艾妮瞓身追夢做歌手

日前英皇新人艾妮(Elly) 接受TVB娛樂新聞台節目專訪，分享放棄護士工作加入樂壇、推出HIFI碟的感受。

Elly說：“我鍾意唱歌，所以就參加《超級巨聲3》。比賽完結之後，屋企人唔想我收入唔穏定，所以畢業後就做咗護士。但在這六年註冊護士生涯中，我一直都有用業餘時間去唱歌、做酒店駐場歌手，經常早上做護士，六點收工去唱歌。雖然會好辛苦，但我唔想放棄唱歌這個興趣；家人亦知我唔係玩玩吓，既然再有機會唱歌，佢哋都好支持我。”

問到今年才投身樂壇有否擔心遲起步？她說：“的確係遲起步，但我會把握時間，唔會浪費每一分每一秒。我會學彈琴同唱歌，增值自己，雖然遲咗少少，但係我會追返上去。而且做護士時已經練得一身鋼鐵體質，所以好捱得。”

談到如何保持靚聲錄HIFI唱片？艾妮說：“我本身氣管唔好、好敏感，所以去錄音前我會煲好石斛加胖大海當茶飲，可以加少少花旗參同蜂蜜，食多些蘋果雪梨保持把聲潤滑。我對醫學知識特別有興趣，所以對中醫有啲研究。”