伯樂汪洋快人一步

馬季開鑼跑過多仗後，華洋騎師大部分已開齋，現剩艾比、中野省吾、任布利及黎昌全未贏馬。恩利克季初停賽三次，上仗復出憑馮廄“好運先生”取得今季第一W。恩利克上季以四十W排名龍虎榜次席，計成績不差。此子騎功未算一流，但時有神來之筆，上季不少馬在其胯下開齋。如“莫特上校”、“凱旋”、“精選名駒”及“帝皇雄鷹”等，贏完用其他騎師主轡再無頭馬交出。由此可見，恩利克騎功有分量。做騎師最怕實力馬騎來交不出水準，應贏變輸。若下駟勝上駟，當受練者及馬主青睞。恩利克近季獲各廄器重，是有其可取之處。史偉恩上季交馬予其搏殺頻有戰功，旗下“追鷹”及“伯樂汪洋”臨場落重飛，俱順利得勝，騎練合作搵到食。史偉恩視恩利克為殺手，兩人今季續有合作。周六沙草混戰跑六場，史偉恩有馬交恩利克搏殺，此雙騎練又來搵食，不妨吼緊。

第一場三四歲馬千二米。“伯樂汪洋”新季首次上陣，賽前打磨充分，馬匹操足有備而臨，值得優先考慮。“伯樂汪洋”上季千五出閘搶放，全程自造步速，一口氣直帶到底，大勝對手六個馬位，贏來兵不血刃，表現令人刮目相看。此駒質新、潛力不弱，上仗贏完只加六分。休後重上征途，於混合賽論馬夠班。今仗縮程跑千二米，新季初出憑新鮮不怕路短，遇上同組對手無多，出閘快人一步，有權直帶到底。