金牌司儀迷魂鎖

何B，叔父輩電視迷當知係乜誰。當年電視台有大騷，幾乎冇佢唔得，尤其選美，做足十五年司儀。佢亦莊亦諧，談吐有度，霑叔黃霑亦大讚佢唔過火唔出位，兼且記性好，金牌司儀，當之無愧。

何B，何守信，皆因波叔梁醒波一句“何必守信”而名。本讀化學，鍾蛇鍾景輝度佢升仙。其時電視台流行播摔角，佢接手前任，講到天花龍鳳，乃至當年學生哥幾乎個個都識迷魂鎖。

何B曾任體育助教，佢講體育，自然到肉。當年旁白世界盃，曾陪住唔少球迷成長。其後講而優則演，上《歡樂今宵》，同沈肥肥係至佳拍檔。當年與劉家傑、黃霑組成港姐選舉無敵司儀鐵三角。

何B唔風流，卻有風流史。當年同汪阿姐拍拖，乃一時熱話，但佢講明冇同居。其後捲入桃色案件遭勒索，法官為保護證人，禁傳媒用真名，“X先生”遂名傳遐邇。何B自此退休歸隱加國。今日係佢八十牛一。

西門公子