曾偉明揭當年過檔亞視原委

資深藝人曾偉明日前亮相香港開電視節目，與主持人苑瓊丹一齊回憶昔日在亞視的經歷。曾偉明自認“惡形惡相”，多年來未試過拍感情戲：“咁多年未試過有女伴的角色，都係叫我拍打戲多，所以老婆唔會怕我戲假情真。當年我經常要拍打戲，試過連續兩年都在八廠（拍動作場面）度日，拍的都係賣埠、冇得翻睇。加上拍古裝劇花時間，最長試過拍足七日都係計一個騷，簡直係唔抵。我呢十三年係廉價出讓青春。”

曾偉明表示自己誤打誤撞入行，當年合約將完結時，亞視靠誠意打動曾偉明，令他答應過檔：“當年我同發仔（周潤發）去新加坡做舞台劇，我話返來才簽新約啦，點知公司拋出份合約叫簽啦，你唔簽去得邊啊！仲好闊佬咁加五十蚊人工，我就點都唔簽住！期間亞視高層專登飛去新加坡搵我傾，人工加三倍即時畀訂金，返到香港仲約你食飯簽約，第一次感受大明星待遇。”

現時曾偉明處於半退休狀態，出任村長幫助居民，閒時釣魚打發時間，兒子亦好乖：“他明白我返工辛苦，我未讀過大學，他要幫我完成心願。太太是我的初戀，幾十年來都未與她講過我愛你，因為我在戲行，明白越唔講的越真實。呢次透過節目被迫示愛，苑仔真係大整蠱！”