江伊晴疫情下擴張貓酒店

藝人江伊晴（Elanne，前名江若琳）兩年前與朋友合資開設貓酒店，今年更細舖搬大舖。日前她接受香港開電視訪問，分享疫情下擴充的大膽想法：“呢件事對我來講好瘋狂，好多人覺得我癲咗！疫情下最差試過淨係得一間房租出，但點解呢個市道下仍然想搬間大舖？係因為呢兩年，呢盤生意真係令我好開心、好有成功感，幫到好多寵物主人，直至現時有二百幾個熟客。”

雖然疫情下經營困難，但Elanne從未想過放棄，皆因背後得到老公蕭唯展(Oscar)不斷鼓勵。她表示：“佢畀我好大支持，生意差時，我有問過佢應該點做？佢有同我講，做生意一定有高有低，如果遇到少少難關就話要放棄，呢個唔係我自己。”

提到Oscar的飲食生意在疫情下同樣受到衝擊，Elanne坦言有關心對方：“我梗係有關心佢工作，因為疫情下人們少出街食飯，生意一定有影響！不過我唔會好擔心，因為始終佢做生意咁多年，我會在旁邊不斷支持佢！疫情期間，佢有問我做呢個抗疫套餐好唔好，然後我就會作為一個普通市民，望住個餐單想吓係咪吸引、抵唔抵，再畀返意見畀佢。”