鼎爺不愧萬人迷

顛倒嬌娃的型男，又多一個品種。

傳統的有“玉樹臨風”周星馳（電影對白）；還有唇紅齒白“小鮮肉”；現在女影迷的胃口越來越大，七十三歲的“阿爺”李家鼎，膚色黝黑，笑起來滿臉皺紋，說話粗豪，卻大受歡迎，去街市經常被女圍——靠的是一把菜刀和一隻鑊鏟。

《阿爺廚房》播到第五輯，“ 鼎爺”廚神形象深入民心。經常被女圍的原因，多是問家常菜煮法，他都來者不拒，樂意詳細解答：“別人有心請教便分享，自己收收埋埋無用的，幫到人才是開心事。”家中另一半可有呷醋？“呷甚麼醋！難得我有人圍。她還說我常炮製美食，把她食肥了。”疫情下，飲食業成重災區，鼎爺表示他的私房菜館損失過千萬元；不過，冇炒一個伙計，亦冇八折支薪出糧：“當初別人為你做、為你搏，幫你打天下，所以，有甚麼問題都一起上。”

唔講唔知，鼎爺拍烹飪節目，竟然拍到幾乎冇命。為拍攝古法西瓜酸炒牛肉，去精挑細選食材，到無遮無擋的地方拍外景。烈日當空，鼎爺有次幾乎暈倒。他說，“記得當日大暑，我跟阿譚說有點暈，叫她唔好郁要傍住我，拍完即刻用水沖頭降溫。其實，我有權立即休息不拍的，但我不想影響拍攝進度。”

談到拍攝抛鑊的片頭，鼎爺功架盡顯。原來，拍攝時要連續抛鑊五十次，鼎爺大叫“導演黐線！變態嘅！”其詞實有憾焉，其心實喜之。舊時富豪或酒家聘大廚的必然考題“乾炒牛河”，就係抛鑊眞功夫，非有深厚內功不可。縱覽鋪天蓋地的飲食高手，誰敢表演抛鑊？但阿譚大爆並非導演黐線，係鼎爺唔收貨，繼續抛鑊，抛到最完美一Take為止。

“不辛苦，不過攰囉。”畢竟薑是老的辣，“做好一味餸，不是一個人功勞，難得遇到一個唔Hea又合作愉快的拍攝團隊，大家相處如家人。”

世上最好味：人情味！

高 梁