比利估波變燈神

上世紀六十年代，世界足壇有兩“黑”：黑珍珠比利，黑豹尤西比奧。前者出於巴西，後者來自葡萄牙，兩黑叱咤球壇，各踞千秋。惜黑豹早已作古，珍珠尚在人間。今日係比利八十壽辰。

二十世紀最偉大體育明星，國際足總授“球王”榮譽，比公當之無愧。十六歲出道，十七歲一鳴驚人，新星乍現，足球場忽然光芒四射。佢代表國家隊三捧世界盃，廿載足球生涯，出場千三次，入波千二球，奇跡！

比公出身寒微，卻係街頭赤腳足霸，小小球童已名震四方。佢雙腳似裝了智慧引擎，截佢唔到，攔佢唔住，波雖係圓，卻聽晒佢話。自有足球面世，如斯將才，前無古人，恐亦後無來者。

比公球技了得，卻係烏鴉口。搵佢貼波，周時買大開小。有年佢貼某國會贏世界盃，全世界都信，卒之中空寶，隊中後衛回國後更遭槍殺，無辜也矣！縱然如此，比公依然係舉世公認的“球王”。

西門公子