借橋入籍玩離婚

歐大狀行走法院數十載，見盡人間無數活劇，悲歡離合，奇情怪事。嗰日公子群聚，佢講古。

憶當年，某日開庭，兩男女興訟，事關離婚。庭審乃番邦法官，好人一個，細問情由：好地地何解離婚？男女二人支支吾吾，欲言又止。法官苦口婆心：咁喇，唔好衝動，返屋企諗清楚，三個月後再來。

月後復開庭，男女二人庭外候召。歐大狀巡見二人言笑晏晏，相敬如賓，女方更手執鮮花。大狀心生狐疑：咁款，一啲唔似離婚。遂予專業告誡：等陣見法官，若真想離婚，唔該畀個戰鬥格，當正仇人。

開庭。兩人果然變世仇，怒目相向。法官再問：係咪真要離婚？男女斬釘截鐵：係！見此情狀，法官無奈搖頭，唯有大筆一揮：判離。

剛出法庭，男女二人攬頭攬髻，又攬又錫，開心過洞房。原來女方持西洋護照，男方結婚，乃借橋入籍。如今護照到手，離婚各奔前程。歐大狀才恍然大悟！

西門公子