小肥咀師兄嗌到聲沙

改編自《紅VAN》作家Mr.Pizza之原創短篇、由導演劉翁執導拍攝的十個單元《把砒霜留給自己》，將於本周五在hmvod上架。

周五打頭炮率先推出的首個故事《交易》，由“師兄”劉浩龍及陳漢娜主演。師兄以冬菇頭社團大佬造型現身，一身懷舊鮮色打扮好醒目；但其角色殺人唔眨眼，每次殺人前又要對方簽器官捐贈卡。師兄笑說：“其實幾矛盾，又要殺人又想做好事，呢個大佬真係心理不平衡。但原來要睇返我同小肥的前傳才知道原因。”

師兄所指的前傳，其實係主題曲《砒霜之後》的十五分鐘MV劇場版。講述師兄同小肥追隨黑社會大佬葛民輝，阿葛因為江湖恩怨遇襲重傷，被仇家搞到成面粉又成身血，最後他傳位給師兄與小肥。但兩人做話事人後意見分歧，原來小肥一直暗戀師兄，眼見師兄媾女又心酸，結果他鼓起勇氣咀師兄示愛。

提起這場戲，小肥形容拍攝係“痛苦”：“同師兄爭咀係我拍攝的第一場戲，所以彩排咗好耐，痛苦！因為係整個MV畫面同語氣最激的一場，嗌到聲都沙埋，又唔記得飲水。第一場戲大家比較難捉路，但好彩導演指點、試咗好多次，最後出街就係依家咁啦。”