夠響夠獎捲土重來

今季賽事每次總投注約三百餘萬，偶爾會有四百萬，但每次跑六場，馬會抽水兩成計，真係連獎金都唔夠畀。今季外地馬取消轉播，只剩港馬有得玩，對馬迷而言頗為失落。目前因疫情關係已無騎師來澳，致人手有限。近期不少騎者被罰停賽，可以罰款代刑。賽事安排最近已無十四駒角逐，至多只跑十二匹，季內如續有騎師身體不適缺陣，未知會方又如何對策。

四月首場賽事，周六上演草地日馬，六場排位已面世。練者李家輝於三月分憑“汪臣”、“安康之星”由何華麟及恩利克操刀建功，馬房獲得今季第六W。李家輝練馬功夫有一手，部署出擊亦有計劃。此廄今季較慢熱，至今取六W成績下游。究其原因，廄內兵源不足。俗話說：“無遮無扇，神仙難變”，練者無馬又如何出擊。

輝廄馬部分連年征戰用得盡，季內不少已退役，現連新帶舊得十駒。倉口規模轉細，搏殺就要準繩，務求一擊即中，免浪費子彈。輝廄馬最近連番搏失，上仗“多臣”臨場票如雨下，最後獨贏熱到得兩倍，惜出閘失機只跑梗頸四，令捧場客損手。前兩仗“夠響夠獎”大熱跑第二，亦飲恨而回。其實馬房搏馬偶有失手唔奇，只要騎師真心去拼，縱跑輸無話可說。周六“夠響夠獎”敗後捲土重來，今仗復跑千二米開齋路程，形勢逆轉。此質新馬實力未用盡，現仍有分在手。李家輝一向器重何華麟，今季六W當中四W由此子勝出，可見騎練合作無間。“夠響夠獎”續交何華麟搏殺，冀今仗贏馬補中。