金奔馳盡地一煲

周六上演草地日馬，排位昨公佈。華將陳卓鋒上次“落樓”傷勢不重，周六可復出參戰。今仗騎師共十二人，遇上十二駒場合剛好夠人手，否則有馬無人騎。各場混戰局面較多，形勢暗湧重重，個別場次一廄出三駒。揀馬費煞思量，投注須仔細分析。

謝、何廄近日備戰積極，周二主課期派遣鎮倉寶“金槍霸”試閘，交老搭檔余健雄主轡，出閘領放一口氣帶返，大勝對手成條街。此駒季內兩戰皆捷，沙地短途全無敵手，表現令人矚目。上仗贏後唞夠重新打磨，今次試閘勇猛，不日重上征途可吼緊。

謝、何廄前仗勝出“金寶馬”，累計九W排名十二位，成績不過不失。此廄前季共取三十七W，屬兩位練者孖倉後最佳一季。但隨着贏馬高峰期過後，連季成績見回落。今季因養馬驟減，倉口現有十三駒，同前季擁二十餘駒，數量差近半。且部分用得較盡，如“飲水思源”及“金奔馳”戰鬥力已不如前，但兩位練者仍想方設法贏馬，務求向馬主交代。今季“飲水思源”六戰取冠亞季各一，此匹八歲馬有此表現，練者算交到功課。唯“金奔馳”於兩年前打疊贏兩場後，至今再無頭馬見面。此駒沉寂多時，評分不斷下調，於對前三仗沙地一五一○米闖入冷位，表現有起色。周六“金奔馳”出戰第五場五六班千八米，計馬佔盡便宜。此匹十歲馬已接近淘汰邊緣，但練者謝貴全保養老馬特別有一手，早年“多寶”逾十歲仍有一番功業。“金奔馳”今次燉至五六班出戰，論對手班底無一能及，用上獲減三磅張志立執韁有着數。此子以往騎過有合作經驗，今仗落班盡地一煲，坐亞望冠可做到，信不信由你。