做導師似搞“師生戀”

泳兒：觀眾捧場唔捨得

泳兒、張天賦、譚嘉儀、陳凱詠等歌手，前晚於將軍澳電視城錄影《勁歌金曲》。泳兒透露節目中會跟三位素人合唱其歌曲《所有遺失的東西》，她指經常有人指其歌曲很難唱，所以有人選唱自己的歌都很開心。自從她當上《聲夢傳奇》導師後，她多了跟其他人合唱的機會，每次演出後她都會做檢討。

泳兒說：“曾有網民留言批評導師太搶，始終學員未去到歌星的級數，所以要取得平衡，（當年參加歌唱比賽，有冇同歌手合唱經驗？）參加新秀同Boy' z合唱過，（觀眾讚你唱得好過原唱！）唔好咁講。”

談到其紅隊隊員姚焯菲近日人氣急升，泳兒替每位學員開心：“睇住佢哋由零到依家，當初個節目做唔做得成都未知，每次我都只得兩三日時間教佢哋，我成日形容好似同佢哋每個拍兩三日拖一樣，但功勞全歸佢哋。多謝佢哋信任我哋一班導師，雖然做導師好大壓力，差唔多講咗我一世人要講的說話，但節目就快結束，我都好唔捨得。”

泳兒稱很開心節目得到大家支持，日前她駕車至紅綠燈位前，隔離車的男司機不斷向她揮手，初時她還以為自己部車又爆呔，原來對方是想跟她說正追看《聲夢》。

曾參加ViuTV《全民造星2》比賽並得到亞軍的張天賦，前晚首次踏足電視城，節目中他獻唱新歌《反對無效》，並接受即場歌藝點評。

他直言作為新人很需要評語，知道自己有何不足，雖然殘忍，但對他是好事。可擔心評語太過尖酸會忍不住哭？張天賦說之前參加其他比賽時，已見過一些過份的抨擊，所以已經有心理準備：“曾有人批評過我啲態度咁樣，唱得幾好都冇用，我已經改善咗好多，亦已經冇遲到。”