李靜儀與趙慧珊重拾舞鞋

李靜儀(Heidi)與趙慧珊(Aka)日前相約到排舞室練新舞，更把跳舞片段放上社交平台分享。

Aka與Heidi都是愛舞之人，經常相約抽空練舞。可惜因疫情關係，加上早前要拍戲，故兩人大半年都無踏進排舞室。時隔多月再踏進排舞室，兩人異口同聲表示：“重拾以前着高跟鞋的感覺！以前好辛苦去練舞嘅回憶湧現返出嚟。”問到今次排練甚麼舞步？Aka表示今次舞步充滿女人味，因為要着高踭鞋跳。Heidi笑言：“好耐冇試過着高跟鞋去跳舞，今日都覺得有啲困難，差啲仆親。”

相隔大半年再跳舞，舞技可有生疏？Aka表示：“唔算生疏，其實之前要多啲時間去夾好多動作，但今次大家反而容易跳齊咗，可能係因為兩個人跳。”Heidi則說：“可能兩個人跳舞，就位會簡單啲；多人跳的話，就位時動作都會較複雜、要用多啲時間，我覺得今次都有進步。”

Heidi透露拍畢電影後，有意去上戲劇班進修演技，還打算叫上Aka一齊。雖然Aka聞言後即刻答應，但Heidi卻爆料說：“之前成日話約去上堂學嘢，太多次喇！我哋成日天馬行空想去學唔同嘅嘢，但係仲未學到甚麼。”