孖王嘉儀拍廣告

周國賢扮紳士任蚊咬

某國際品牌為慶祝成立一百一十周年，邀請周國賢 (Endy)與王嘉儀 (Sophy) 拍攝廣告，周國賢化身古典派代表，而Sophy則為現代派，從中帶出百年美學。

雖然拍攝期間天下大雨，但Endy和Sophy仍能型格地擺出各款甫士，表現十分專業。Endy表示：“今次同Sophy一齊拍廣告，呢個係好有品味嘅組合，雖然我係做古典派代表，但品牌話佢地係睇中我嘅氣質，而唔係我平時造型夠古典。今次造型我都同造型師開過好多次會，佢哋話我戴紳士帽好有型，雖然戶外拍攝實畀蚊咬，但係紳士唔可以周圍搲痕咁麻甩，要死頂扮冇事，型埋佢。”

拍攝期間，Endy要用“菲林機”周圍拍攝，他更出動私伙相機上陣：“我又唔係儲相機狂迷，但都有一兩部睇吓門口，而且用人哋嘅相機，始終冇自己嘅咁熟悉，拍出嚟冇咁自在。依家一部古董相機都要幾萬文，頭先落太大雨滴濕少少都幾心痛，但係為咗效果都要頂硬上。”

早前周國賢獲香港導演會頒發影帝大獎，這部電影受到疫情影響數度延期上映，Endy 坦言這獎項為拍攝團隊打下強心針：“要多謝台前幕後所有嘅人，話畀人知原來周國賢都識做戲喎，我都未決定點樣慶祝，可能再等情況好啲，就約晒所有人出嚟食餐勁嘅！”

Sophy最近加盟幻國文化後的第一個工作，就係與Endy首度合作，她表示：“我哋呢個廣告雖然喺同一場地拍攝，但角色設定係唔識對方，所以同 Endy 嘅對手戲都係點到即止，當知道可以同佢一齊拍攝時，真係好開心，因為我一直都好欣賞佢嘅音樂才華，希望嚟緊更加可以喺音樂上有交流啦！”Sophy不時露出小蠻腰，流露青春氣息，她笑言拍攝完畢後可自我放縱一星期，因為試完衫之後，知道要露腰影相，她便食得好清淡、戒零食，每日都有健身操練。她表示；“依家影完我終於可以食餐勁嘅，不過嚟緊要開始做歌，過返日夜顛倒嘅生活，應該唔洗節食都會瘦返。”