興圓興測四捷五冠

馬季臨近煞科，本季尚餘四次賽事。上周兩仗一些季內未贏之駒力爭出頭。錢廄“勝利鴻星”、“合夥輝煌”齊齊打破齋砵，練者已有交代。亦有一些季內取得多捷馬伺機搵食，如“興圓”、“興測”上仗俱得甜頭。這兩匹同主馬今季好到你唔信，表現脫胎換骨。隸屬貴廄“興圓”上季在澳服役六戰無功，當時礙於未熟，跑來有前無後，貫注力不足。經唞暑後重新調教，開季首戰雖落敗，隨後改配黎昌全即爆冷贏馬。“興圓”季內多仗不勝即位，長期有好表現。上仗搏殺一擊即中，迄今取四冠四亞一季，戰績可人。此駒跟得鬥得，跑千五及千八米拿手好戲，但沙地則無績可稽。“興圓”由三十六分起步，現調至五十七分，開竅後扶搖直上。練者今季撚好“興圓”長跑長有，值得一讚。

賀廄“興測”同“興圓”賽績比較，有過之而無不及。上仗短途出閘搶放，全程一氣呵成帶到，贏來大把在手。季初“興測”屢拼不逞，跑極至多得二三名，季中表現才轉好。此駒開齋一役，由中野省吾跑千五米一放迄終。開竅後愈戰愈勇，今季有五捷在手，屬賀廄爭分棋子。練者訓練“興測”得法，盡顯功力。興系馬主早年在濠江養馬不少，近年轉戰香江，在本地仍豢養“興圓”、“興測”，兩駒今季共取九場頭馬，還有多場二三名，計獎金不菲，馬主名利雙收。