昨日賽事總投注近三百六十萬

余健雄張志立起孖

昨天草地黃昏馬完結。是仗出馬稍增，戲碼尚算不弱，六場總投注額共三百五十九萬元。

頭場未勝出馬跑千二米，余健雄騎譚廄“豐收日”，以無敵姿態掄元。此駒季內多仗無建樹，上次沙地一五一○米放至埋門始敗。今次唞過再來，原配余健雄轉跑草地千二米。騎者出閘搶先霸住內欄走，全程一氣呵成帶返，贏至對手無力招架。“豐收日”賽至季末終於打開勝利門，余健雄、譚文就合作愉快。

第二場余健雄搏殺起孖。此子頭場開餬後乘勝追擊，是場騎兆廄“江河麗影”，以較佳留放後上挫敵。此駒上次田中正一跑千二米只得梗頸四，今次增程跑千五米，易配余健雄再拼。騎者出閘留住五六位，沿途且戰且走，入直路發力衝刺，埋門將對手一網成擒，替馬匹開齋。“江河麗影”質新進步，贏馬開竅後還有進步空間，下季跑千五米仍堪重視。兆廄添頭馬，余健雄起孖。

第三場高君濤贏馬。此子騎賀廄“博名”，埋門前以強勁衝刺力壓“國金財進”，贏來有驚無險。此駒初次在澳上陣，臨場捧成大熱門，可見幕後有信心。高君濤騎來發揮水準，替馬匹打開勝利之門。

第四場田中正一贏貴廄“興圓”。此雙人馬上次同程得勝唞過又來，今仗原裝配搭出戰首本路。騎者出閘快步跟住三四位，入直路發力衝刺，埋門脫穎而出，贏來輕鬆自如，替馬房再建一功。“興圓”今季取五W，夥拍田中正一連捷，人馬贏到開巷。

第五場新馬賽，張志立贏錢廄“奇峰王者”。此駒初出票數硬朗，被捧成次熱門，出閘搶放，沿途拍實快馬“金融時代”而跑，埋門挫敗對手，替馬匹打響頭炮。是場大熱門“印度王子”起步大漏閘讓賽成條街，結果追回第五，W、P、Q齊撻輸得多。

尾場張志立騎浩廄“豪爽”爆冷起孖。此駒上次由高君濤贏同程，拼後小休改配張志立再戰。騎者出閘守好位，全程亦步亦趨，入直路一攻而破，爆十三倍冷W替浩廄建功。