反轉衫着入錯男廁忘記經期

黃榕單身三年Dry爆

昨日，黃榕、林雅詩到佐敦出席活動。黃榕穿上藍色吊帶短裙現身，但被發現裙子反轉穿着，她一臉尷尬說：“我好大頭蝦，已經唔係第一次發生呢啲事，試過反轉內褲着，又試過新衫冇剪牌就着出街，仲有經常唔小心入錯男廁，認錯人，又試過去完洗手間，裙腳攝起都唔知，幸得途人提醒，我仲以為對方想識我。”

黃榕自爆日前生理期到也懵然不知，當時還正在教健身班，幸好穿深色褲才沒被發現。連生理期也忘記，擔唔擔心容易搞出人命？她笑說：“可能近期比賽壓力大，荷爾蒙亂啲影響經期，不過我三年冇男友，唔會發生呢回事。”恨拍拖的她說雖然有朋友介紹男生，但都不適合，又聲稱自己擇偶條件要求不高：“大隻、靚仔、專一就夠，唔使有錢，高矮都冇所謂，姊弟戀我都接受。”

久未露面的林雅詩說，受疫情影響加上租約期滿，早前已將時裝生意結束，暫不打算再在香港做生意，反而計劃在英國開茶餐廳。她說家人在英國南部經營日本餐館，兒子亦在當地讀書。有感近日不少港人移居英國，當地又很少港式茶餐廳，正考慮在當地開茶餐廳。被問到是否打算移民，林雅詩說：“都有意思，同埋我而家做緊中介生意，代辦去英國留學，可能去英國後或者再讀書都未定，但都有憂慮，因為做自己唔熟悉嘅嘢，同埋之前在香港同內地建立嘅工作，如果貿然走咗就有啲可惜。”

跟舊愛馬天樂是否已徹底分開？林雅詩說：“係呀！閉關咁耐，真係醒晒，（會否復合？）世事好難講，不過應該唔會，對與錯都好，大家都要重生。”她又謂暫時不想拍拖，亦沒有追求者：“唔好追求我，而家好享受一個人自由自在生活。”