同男友講心唔講金

盧慧敏生日在家簡單過

盧慧敏(Amy Lo)昨天到中環為 “光藝大師”期間限定展擔任嘉賓。配戴上品牌標誌性新產品，令Amy大為心動說：“我好鍾意呢個品牌嘅首飾，細細粒好骨子、好精緻，我好相信Love，愛係好開心，我亦都有講過，如果畀我做一個大自然嘅角色，我會做蜜蜂，因為默默耕耘、好忠心，知道自己要乜、好低調、謙虛。”

本月四日是Amy的生日，她跟男友Ian （陳卓賢）前後腳出席活動，向來低調的她甜入心：“可以幫同一個品牌工作好開心，呢個係生日後首個活動，咁嘅工作形式，低調得來係一件開心事。我喺現場見到佢哋有人着住Fans Club嘅衫喺我會場出現，知道佢哋好錫我，又好錫佢，係開心嘅。”

現場亦有她的“小樹苗粉絲”到場支持，令Amy十分感動：“冇惗過出席活動都有粉絲撑場，佢哋製作咗啲心意卡，又製作燈牌，有我同小樹苗個名，發覺原來自己都好討人喜歡喎，好感動，嘻嘻。”

提到Ian在活動中透露有跟Amy慶祝生日，還指二人講心唔講金，Amy直認拍拖講求心靈多於一切，她說：“今年生日喺屋企，揀咗自己一套好鍾意嘅電影，呢部電影我睇咗差不多有一百次，就係《機場客運站》。生日嘅時候攞返出嚟睇，默默為自己慶祝。我鍾意簡簡單單，同屋企人食餐飯、切蛋糕吹蠟燭，一齊睇戲，都收到啲手作嘅禮物。”

她又說：“其實所有關係，無論朋友、情侶或屋企人，都唔會講金，用心去對待大家咁先可以維持。我好注重溝通，心靈上係好重要嘅，每段關係都建基於大家嘅呵護同了解，每一段關係都講心唔講金嘅。”