施匡翹苦練邊跳邊唱

日前施匡翹作客TVB娛樂新聞台節目《StarTalk》，接受許文軒專訪，大談一改歌路推出新歌《Stay》的感受。她說：“今次出歌好期待，因為之前一直唱慢歌，自己一入公司，同事已經知道我中學有跳舞，我估自己有冇機會唱跳舞歌曲呢？到今次《Stay》終於可以跳舞加唱歌，呢首歌係一首中板情歌，跳Jazz Funk，中學就係學呢種舞。但邊跳邊唱原來都幾難，一用力就顧唔到聲線穩定性，要不斷練習。”

施匡翹談到錄音的習慣：“一直以嚟錄音都要熄燈，因為錄音時覺得自己個樣唔好睇，有時會唱到面容扭曲，今次錄《Stay》初初都有熄燈，但係監製舒文話我錄到好慘咁，所以我就試吓開燈，果然係好啲！另外我錄音一定要有支潤唇膏傍身，上年錄音時發現唱得唔好，唔順，原來個嘴好乾，好唔自在，錄錄吓都要停，舒文仲叫我去買潤唇膏。依家手袋一定有幾支，上台前都要搽一下。”