昨晚賽事總投注逾三百二十萬

譚文就高君濤起孖

昨晚沙地補賽順利完成，六場總投注額三百廿二萬二千元。

開跑前落雨，幸對賽事無大影響。頭場爆冷揭開戰幔，中野省吾騎譚廄“大玩意” 快放輕取對手。此駒上次安萬堯跑同程得梗頸四，今次換上中野省吾再拼。騎者出閘快步跟前，三扒兩撥透出領先，沿途無擠無阻一氣呵成帶返終點，贏來無驚無險，十倍冷W中者好分。譚文就、中野省吾攜手先拔頭籌。

第二場王君適廄包辦馬房冷Q。旗下“根本英俊”由恩利克掛帥，埋門憑後勁挫敗廄侶“量子力學”，爆出八十七倍大冷W。此駒上次草地千二米高君濤跑梗頸四，今次轉換場地易配恩利克成大冷門。騎者一條直路殺上，贏來“魚生粥僅僅熟”。此質新馬今次打開來澳勝利門，騎、練齊居功。適廄贏馬兼包Q，收穫豐富。

第三場爆開又爆，譚廄“豐收寶”由安萬堯操刀，以較佳留放挫敵。此雙人馬上次一三五○米得第四，敗後小休重來，今次原配增程跑千六米。騎者出閘守好位，沿途主動爭先，轉末彎發力掟甩對手直奔終點，爆十一倍冷W。安萬堯喜添今季第三W，譚文就是晚起孖。

第四場摩利高贏馬。旗下“縱橫大師”交任布利主轡，以強橫衝刺挫敗對手，替馬匹打開來澳勝利門，任布利今季開齋。此雙人馬上季曾大熱倒灶，今季首戰沙地表現判若兩駒，七倍半冷算好分。摩利高、任布利攜手贏馬。

第五場高君濤開餬。此子前半場座騎全死火輸得人多，賽至此場騎馮廄“軍事強人”，食雞餬開齋。此雙人馬上季屢拼不出頭，跑至今仗再交高君濤主轡，憑駕輕就熟後上挫敵，替馬匹打開齋。

尾場高君濤起孖。此子贏完“軍事強人”乘勝追擊，是場替賀廄“美麗人生”出戰，以較強後勁撼低對手，替賀廄開齋。此駒今次跑沙地走勢有前有後，表現大幅進步。賀蘭杜夫打開新季勝門，高君濤梅開二度，成績不俗。