與伍仲衡拍專輯照通街逛

王菀之即興寫歌

王菀之與音樂人伍仲衡為紀念相識逾廿年，攜手合作推出專輯。芸芸音樂界好友中，為何只與伍仲衡慶祝相識並製作專輯呢？她說：“因為伍仲衡帶我入行，佢係我音樂路上的伯樂。”

唱作女歌手王菀之(Ivana)與音樂人伍仲衡為紀念相識超過二十周年，攜手合作了一張專輯《仍然記得嗰一次》，Ivana感激伍仲衡作為音樂路上的伯樂帶她入行：“我想以一個特別的音樂形式慶祝和紀念呢份友誼，感謝佢。”雖然專輯於大半年前已開始構思，但音樂製作只花了兩個月時間就光速完成，伍仲衡笑言：“破晒人生紀錄，不過以專輯紀念友誼，是一件好威水的事情！因為呢份禮物用錢也買不到，兼且是長青。加上今次我參與製作部分更多，係完全屬於我的Baby！”

為配合專輯“日與夜”的意念，Ivana與伍仲衡分別走訪多個景點影靚相，包括咖啡店、大牌檔、水果檔及舊式唱片舖尋寶。穿白色長裙、仙氣十足的Ivana，由清晨開始就在不同文青咖啡店打卡，期間在一間有貓貓的店裡邊玩貓邊拍照；在一家佈滿書籍的咖啡店，她更創意大爆發，即場寫了一段旋律。

至於伍仲衡，就從黃昏開始穿梭香港大街小巷拍攝，悠然地在大牌檔歎奶茶、在街市水果檔與街坊閒聊，再到舊式唱片舖尋寶。回想與Ivana的第一次碰面，伍仲衡說：“大約廿一年前，由朋友介紹Ivana幫我唱Demo。我第一次聽到佢把聲，嘩！好好聽，點知佢仲識寫歌。於是佢幫我唱Demo、我幫佢做Demo，好快佢啲歌由張學友唱咗（《我真的受傷了》），成為大家都好鍾意的歌。後來Ivana讀完書就返香港做歌手。”

這次與伍仲衡合作專輯，Ivana表示非常開心和期待：“呢張專輯係一個好有驚喜的項目，我好期待！因為對我來說唔只係出碟咁簡單，仲記錄我和伍仲衡兩個音樂創作人識咗廿幾年的友誼，係一個慶祝項目。”