昨日賽事總投注逾三百十五萬

賀蘭杜夫王君適起孖

昨天草地賽完結。是仗戲碼較強，六場總投注三百一十五萬三千元。

頭場六班混戰爆冷開場。賀蘭杜夫廄“幸運星”由艾比押陣，力挫廄侶“聯安百勝”，爆七倍冷W。此雙人馬上仗沙地短途無功而回，今次出爭草地千五米。騎者出閘跟貼對手，入直路發力衝剌，挫敗廄侶“聯安百勝”，替馬匹打開新季勝利門。賀廄是場包辦馬房Q，艾比亦新季開齋。

第二場中野省吾贏馬。王君適廄“譜錄”交其主轡，出閘快放由頭直帶到尾，輕鬆挫敵。此駒連仗有前無後，輸於埋門幾步。今次排一檔起步順利放出，直領到底。騎練齊添進帳。

第三場熱倒冷爆。史偉恩廄馬王“耀昌之星”由中野省吾掛帥，被捧成頂頭大熱。但騎者出閘後甩腳踏，全程就住來跑最終三甲不入，大熱死火輸得人多。是場適廄“幹細胞”由恩利克操刀，後上爆十四倍冷W。此駒上次贏完再來，今次照辦煮碗靠後上食餬，人馬打叠取兩W，適廄喜中孖寶。

第四場賀廄起孖寶。旗下“博名”交高君濤主轡，以強橫衝刺擒敵。此雙人馬上次贏完再來，今次原程續戰捧成大熱。騎者出閘守好位，入直路發力衝刺一攻而破。高君濤贏馬，賀蘭杜夫起孖。

第五場田中正一蠃馬。此子騎錢廄“國金之星”，以較佳留放後上險勝。此駒上季用艾比跑同程，贏完唞過再來，今次原程再戰易配田中正一操刀。騎者發揮水準，替馬匹取得跨季連捷。錢廄贏馬，騎者居功。

尾場史偉恩包辦馬房Q。練者旗下“輕足”由安萬堯押陣，後上力壓廄侶“耀昌王子”，替馬匹打開來澳勝利門。此駒服役未贏過，今次開勝門安萬堯居功。史偉恩包Q食尾餬埋齋。