昨日賽事總投注二百一十三萬

五騎五練平分頭馬

昨天四草一沙賽事完結。是仗天晴地好，角逐過程人馬平安，五場總投注額共二百一十三萬元。

頭場四五班混戰，蔡鎮威廄“金融時代”由艾華利主轡，快放先拔頭籌。此雙人馬上次出閘一放到底，爆四十倍冷W，拼後小休原裝配搭再來。今次原程續戰騎者照辦煮碗，出閘搶放三扒兩撥貼欄而走，沿途小心翼翼，入直路甩開對手率先衝缐，贏來全無壓力替馬匹摘取連捷。“金融時代”開竅後越戰越勇，料季內還有頭馬見面。蔡鎮威喜添頭馬，艾華利應記一功。

第二場劉傲贏適廄“英記好友”。此駒上次張志立跑同程得梗頸四，敗後唞夠再來搏殺。今次用牌仔主轡減磅有利，劉傲出閘留住五六位，入直路發力衝刺，埋門一攻而破，爆八倍半冷替馬房建功。“英記好友”老馬季內表現仍有水準，反映練者保養功夫好。王君適、劉傲攜手贏馬。

第三場三四班混戰爆到七彩。錢健明廄“共贏天下”由田中正一執鞭，以較佳留放後上挫敵。此駒上次張志立跑沙地得第五無功而回，拼後走馬換將改配田中正一再搏。今次草戰排一檔好位，騎者發揮水準，埋門挫敗同場冷馬“江河飛騰”，爆二十四倍冷W，替馬匹打開來澳門勝利門。是場連贏位派六千七百餘元，中者和味。

第四場約尼斯贏賀蘭杜夫廄“伯樂汪洋”。此駒久無頭馬見面，季內轉投賀廄重新操養，馬匹近期表現轉好，上次千八米跑第六。今次縮程至千五米用約尼斯操刀跑法不同，起步搶先貼欄，全程守好位，入直路發力衝刺將對手一網打盡。“伯樂汪洋”贏得轉倉首捷，騎、練齊居功。

尾場黃世浩爆冷食尾餬。此子騎何華麟廄“自在逍遙”，以強橫後勁挫敵。此駒上次中野省吾跑一三五○米得第二，拼後增程改配黃世浩再拼。騎者出閘跟住八九位，沿途且戰且走。入直路展開衝刺，埋門脫穎而出爆十三倍冷W，替馬房建一功。