昨日賽事總投注二百萬

邵艾樂爆冷開齋

昨天草地賽事完結。是仗出馬少，加上全日落雨令人卻步，五場總投注額共二百萬〇四千元。

頭場原本七駒出戰，因“國金軒”賽前退出買少見少只得六駒角逐。高君濤騎賀廄“烈火戰駒”，以較佳留放後上掄元。此駒前仗高君濤贏完放手，改配普健士再戰無功，敗後唞夠捲土重來。今次回配高君濤熟手操刀，出閘快步跟前守好位。入直路發力衝刺，埋門將前領馬“八達城”擒下。“烈火戰駒”千二米專家，季內表現水準穩定，尤其夥拍高君濤更是老搭檔。賀蘭杜夫廄先拔頭籌，騎者居功。

第二場劉傲騎譚廄“型仔合金”險勝對手。此駒上次千五米用梁曉傳主轡無功而回，敗後小休易配再戰，今次由劉傲掛帥跑長途千八米。騎者出閘跟上三、四位，沿途小心翼翼，入直路發力衝刺，埋門同冷馬“靈想”纏鬥，至終點前要影相分先後，結果贏個短頭位，三倍獨贏保不失，替馬房建功。譚文就、劉傲齊添頭馬。

第三場約尼斯贏張兆煊廄“夠響贏瑪”。此駒季內跑同程取得好成績，近兩次用普健士搏殺只得第二。拼後回配老搭檔約尼斯主轡發揮又不同，今遇打水戰人馬跑來更生猛，出閘快步跟前，沿途節節推進，直路逢馬過馬彈甩對手直奔終點。“夠響贏瑪”夥拍約尼斯已取三冠，人馬合作天衣無縫。

第四場日本騎師包辦連贏。田中正一騎馮廄“祥駒”出閘快步搶先，沿途且戰且走，入直路發力衝刺，甩開對手悉先衝線爆十二倍冷門。同場“年年駿”中野省吾跑第二名，此場“日本Q”派逾一百八十元算不俗。馮耀正廄添頭馬，騎者亦居功。

尾場邵艾樂騎鄒廄“得運威威”爆冷開齋。此子上半場搏殺未能贏馬，最多跑入兩場第三。跑至尾場騎“得運威威”出閘留前鬥後，直路以強橫後勁殺上，爆十四倍冷W。鄒欽華廄喜添頭馬，邵艾樂開齋兼食尾餬。