魏浚笙丟書包猛窒鄭裕玲

昨日播出的第四集《去邊啊Do姐》，Jeffrey（魏浚笙）與DoDo相約在東京日本橋見面， Jeffrey一見面就自動波介紹江戶歷史，又解釋為尊重歷史，以一身復古風藍西裝赴約，意義不明但非常有型。二人到日本橋一間老店，品嘗現場即製新鮮和菓子，又試盡日本各款米飯。Jeffrey甫坐下就拋書包， DoDo問他：“白豆沙比紅豆沙係咪淡啲？”Jeffrey說：“唔係，紅豆沙濃啲。”DoDo聽到一頭霧水：“咁我講淡啲有咩唔啱？”Jeffrey教DoDo：“應該用清澈形容！”

二人又品嘗以玄米做主題的和食套餐，DoDo主動“請示”Jeffrey飲食次序，想先由濃味食物開始，被Jeffrey一口否決：“唔得！我哋應該由淡食到濃”。DoDo都有少少激氣：“樣樣你都話唔係，你唔使問我啦。”DoDo感嘆Jeffrey講嘢好似玄米一樣好多水份。Jeffrey賣口乖讚DoDo好young，好像“同細路女溝通，係細路女樣貌，智慧就十分之高超”，DoDo冧晒回敬Jeffrey“好英俊好有趣，完全冇偶像包袱”。Jeffrey對自己的飲食知識非常有信心，又指導DoDo進食時的注意事項，但用詞比較貧乏，品嘗所有食物都循環使用“濃郁”、“淡”來形容。