梁釗峰新碟簽唱會圓夢

明日，梁釗峰將推出新碟《遺憾與遺憾之間的一切》，他日前在戲院舉行新碟分享會。碟內四首歌的MV再加入情節，製作成微電影《遺憾與遺憾之間》，特別安排在戲院播映。雖然由幾個帶着遺憾的愛情MV故事串連，但結局卻是“擁抱遺憾，珍惜當下”，非常正能量。梁釗峰與創作團隊分享趣事，他現場演繹碟內全部歌曲，之後一齊觀看整個計劃的重頭戲，由四首MV貫穿而成的微電影。他透露，在去年農曆年卅晚開第一個會，剛好都是一月廿一日，籌備一年後，同日舉行新碟分享會，別具意義。

他說：“年卅晚開會，特別難忘。整個企劃籌備咗好耐，好開心呢一年認識美術指導張蚊、監製Jacqueline、編劇兼導演Veronica，我哋經歷咗一場展覽、四首歌MV、微電影、唱片設計、今日嘅分享會。我哋之前傾咗無數個夜晚，故事推進和延續，結果變成一個咁完整嘅連載劇場，好多謝大家！”釗峰揚言夢想成真：“我圓咗一個夢，由企劃開始我已經幻想到今日呢一刻，終於發生，能夠歌與歌環環相扣，我睇到眼濕濕，好似去咗一段旅程，多謝所有人。我分別做過寫歌、度故事、拍MV，能夠將所有嘢串連，對於梁釗峰係一個壯舉。多謝每個崗位出力嘅人，多謝公司畀好多愛和資源我去達成，好感恩，我好幸福。”