張繼聰蔡卓妍分享拍攝趣事

張繼聰和蔡卓妍（阿Sa）合演的賀歲片上映在即，近期馬不停蹄做宣傳工作，日前二人接受HoyTV主播俞詠文訪問，分享拍攝時的趣事。

張繼聰表示和阿Sa的合作緣份，可以追溯到《戀上你的床》：“當時其實我係臨時演員，但係我就畀咗自己個身份，就係阿Sa嘅前度，連阿Sa都唔知，我就好入戲喇。”

賀歲片中，阿Sa最難忘就是和修哥胡楓的拍攝戲份：“我真係好respect修哥，佢真係好勁，已經九十五歲，雖然現場個劇本對白不停改，但係修哥每一次都接到，真係令人非常佩服。”而阿聰最難忘就是Ending嘅場口：“因為嗰場全世界嘅演員都喺度，直情玩到癲咗！”

講到賀歲片以賭為題材，阿聰明言自己不愛賭錢：“可能因為細個嘅時候，同啲朋友都有聚埋一齊玩下，點知將所有嘅零用錢輸晒，所以從此之後就唔再賭。而新年同啲屋企人玩嗰啲，唔係叫做賭，係叫做派錢！”阿Sa亦不認自己有賭運：“我諗我嗰啲唔係叫做好運，係以技術取勝，哈哈哈。”