馮允謙學懂面對人生

馮允謙(Jay)推出今年首支派台作品《然之後》，歌詞講述人生經常面對不同的高低起跌，要學懂去接受、面對、放手。Jay說：“好幸運MV找來陳健朗演男主角，點解我自己唔拍？因為首歌想帶出嘅訊息比較沉重，希望大家睇到MV嘅時候會有一個好深嘅感受，所以起用專業嘅演員演出，我覺得比較適合。”

入行超過十年，Jay在唱作路上曾經面對過不少起跌，每當遇上難關，總要學懂自己一個去面對。孤單，並不可怕，Jay坦言，有時候會很享受孤單帶來的平靜。“通常當全日工作完成回到家中，同屋嘅孖生細佬剛巧外遊，會有一種孤單嘅感覺，但當年紀日漸長大，會喜歡自己一個，喜歡嗰份自由、平靜，我係一個比較情感豐富嘅人，無論開心抑或唔開心，又或者好多嘢諗，都會鍾意行吓海旁，又或者同朋友、屋企人、細佬傾偈，尤其當個腦好多嘢諗，要想辦法釋放，行海旁可以令自己得到平靜，喜歡用呢種方法去開解自己，重新整理內心。再且，我身為一個唱作歌手，好多時一個人喺屋企寫歌，當靈感一到，便會花上八、九、十小時埋頭創作，而創作嘅過程，要不斷思考、重整，一個人靜落嚟，會好多嘢諗、好多嘢想講、好多感受，先可以激發到創作靈感。”