曾比特最想與老闆合作出歌

《全民造星Ⅱ》出身、以爆炸頭為標誌的實力唱將曾比特(Mike)，昨日生日的他特別在社交平台上宣佈正式加盟英皇娛樂，並大曬苦練而成的六嚿腹肌相。原來Mike每個星期做足六日Gym，無論當日工作與否，都風雨不改每次做足兩個鐘，展現新開始的決心！

關於簽約曾比特，英皇娛樂集團營運總裁霍汶希(Mani)表示：“《造星》時期已經有留意佢，不過一直未有機會合作。我哋睇到佢唔只係一個有才華嘅歌手，更係一個對音樂有堅持、肯不斷突破自己嘅藝人，亦都好欣賞佢對音樂嘅熱誠同埋嗰份純真。”提到加盟新公司的契機，Mike指一切都是緣份：“係一個好自然嘅過程，雙方對音樂嘅理念好夾，感覺啱Channel，所以就決定一齊開展音樂新旅程。”

提到公司眾多猛人，最想跟哪一位合作，他竟然將目標指向老闆楊受成！他笑說：“希望可以同老闆合作出一首歌，因為平時都係聽老闆演講，但係甚少聽佢唱歌，所以我希望今次我入到嚟可以令老闆開金口。”這願望認真特別，他續說終極期望是跟公司每一位都合作一次。