農夫組合有用垃圾

漫步哥本哈根，談笑風生竟會笑到肚痛。“你識唔識揀女人衫？”Do姐話音未落，“識！”馬明搶答：“我經常陪我阿媽買衫……。”C君笑到碌地，衆皆愕然，你擦錯鞋啦，你陪Do姐買衫，當陪阿媽呀。馬明一陣天然呆，C君立轉話題，你話今年歐洲吹起“印度風”，係咪呢的呀，C君扮打電話手勢，冇風噃。哎吔吔，Do姐跳起，戈指大駡：

“正一垃圾”，嘩，疑似人身攻擊，一默：“不過，你呢兩隻嘢，都算有用垃圾。”

有用垃圾！多年後，“農夫”振奮神威，果有大用。日前社交平台宣佈：“陸永與鄭詩君（C君）成立公司‘農作天下So Fa So Cool’……”垃圾如何有用呢？以前淨係耕種自己的農作物，現在，耕埋其他人的田。

農夫組合二十五年，組製作公司僅於兩天前，“做自己經理人，並主辦舞台演出、演唱會、線上線下活動、涉獵幕前幕後製作……。以前淨係耕種自己農作物嘅瘦田，現在發現，其實所有同行、投資者、創意工作者都係農夫，大家都默默耕耘。日後，如果大家鍾意，一齊耕田，一起下肥，夾手夾腳，將農作物豐收遍天下……。”

新張大吉，農夫官方社交平台，上載二人在新公司辦公室裝修前後的照片。陸永留言：“呢張裝修前後圖，反映到呢二十五年我哋的經濟狀況……。”

C君社交網發文：“以前農夫同人合作最多都係寫吓歌，終於可以同人寫稿、寫劇本、度Show、監製，合力栽種。農夫公司定於明年一月製作《全港棟篤笑大賽》……”

後記：Do姐封C君劉永為“有用垃圾”，太有智慧了，對農夫而言：寶也！肥天下。

高 梁