哲人冷眼看宗教

三百多年前，法國有智者降生。佢以正義文明令世人開竅，主張法律面前人人平等、言論自由，搞死皇帝悶死主教。此，哲人伏爾泰也。

佢厭惡天主教，稱乃係“狡詐之人所設之可恥騙人羅網”，喻教宗為“雙足禽獸”，傳教士係“文明惡棍”。然卻極欣賞孔子，崇拜儒家思想。認為孔子以道德服人，而非宗教狂熱與個人崇拜。

伏公性格妙極，生前自定後事：棺材半埋教堂半埋外。意即上帝要佢上天堂，就從教堂登天；倘要下地獄，則從另側溜之。

“我不同意你的意見，但我誓死捍衛你發言的權利。”大器厚道，正氣澟然，廣傳此為伏公金句，實則是個大烏龍。英國作家霍爾一九〇六年著《伏爾泰的朋友們》一書中曾出此句，卻手多多加了個引號，本來自說自話，反成伏公傳世金句。

今日乃伏公三百卅一齡冥壽。

西門公子