世紀魔星勳章狂

一百一十九年前今日，有魔星降世。

勃列日涅夫，前蘇共中央總書記。上世紀六十年代，美蘇爭霸正酣，佢聯群結派，翹起前老細赫魯曉夫，篡權奪位。赫公無奈，唯有返鄉下耕田。

勃公一朝登頂，即大發神威，出盡法寶，與美國佬玩到七彩。佢唔叻，但威！健力士大全有佢紀錄：世界最多勳章之人。有載竟逾百個。有人授予者，亦有自己授自己者，總之大鋪癮。

勃公有兩大嗜好：打獵與飆車。隨從話，周時打野豬一槍斃命。某年訪美，尼克松送佢“林肯”靚車。勃公即興，挾起尼公上車踩油狂飆，登時嚇窒滿場保鏢。車上尼公與翻譯則幾乎飆尿。

勃公嗜煙如命，為健康計，醫生禁之。為頂煙癮，要保鏢圍圈噴煙，佢則猛索，照食二手煙。喻之為：既不犯禁，亦可頂癮。此公不學無術，某次演講，全場聽到頭岳岳，原來執錯講稿，牛頭唔搭馬嘴，佢照讀如儀。

西門公子