防洪掘路持久戰

營商受損失預算

工期延誤須嚴監

快畀條路街坊行

內港北雨水泵站箱涵渠工程連月施工，掘路處處，巴素打爾古街一帶曾現大塞車，現在連十六浦對面內街更掘到七國咁亂，寸步難行。

日前友人相約到燕主教街某酒店餐廳嘗鮮，深知巴素打爾古街栢港停車場經常冇位泊，亦嫌上十六浦停車場麻煩，遂叫好友駕車載到燕主教街街口。孰料甫落車，嘩，打地道戰咩？掘路幾乎冇路行，要在窄窄行人路兜圈轉入。到內街，同樣“三星掘爛地”，鐵欄處處，偶一不慎或會踩到障礙物。

酒店餐廳在負一層，本來橫門可直落，但因路太窄，改入酒店大堂轉入。

友儕曾試過這餐廳出品，讚精緻美味，與大酒店餐廳不遑多讓。試之，確有水準，可謂“麻雀雖小，五臟俱全”，難怪滿堂食客不嫌掘路麻煩，大抵“酒香不怕巷子深”罷。

這二星級酒店位處海傍低地，當年“天鴿”、“山竹”超強颱風襲澳，再捲風暴潮，一帶變澤國。酒店加設巨型防水閘，仍難逃水劫，損失不菲，尚未回氣，現又遭逢掘路，真箇無可奈何。

無論是大企抑或中小企，包括通商新街、美基街等商戶，掘路遍地開花，生意必然插水，政府扶助杯水車薪，無補於事。

內港箱涵渠工程屬市政署防災減災項目，整個工程分四階段進行，預計二○二一年完工，將可改善該區暴雨水浸及天文潮出現的海水倒灌。長痛不如短痛，商戶及住戶一般都理解，惟此短痛還要捱多兩年，當局須好好為商戶着想，蓋因長年掘路足影響營商環境。居民則希望市政署嚴監工程進度，勿延誤工期，畀條好路街坊行，咁就阿彌陀佛矣！

羅倫斯