聖靈之都跟得鬥得

馬季開鑼已逾一個月，騎師榜形勢有變。何華麟以六W晉升首位，取代了早前帶頭的鮑羅素。何華麟於開鑼日搶攻，中三元先聲奪人。目前衆多外地過江龍前來澳門馬場搵食，隨着巴西鮑羅素，法國安萬堯、黎昌全等崛起，加上兩屆冠軍馬雅及巴拿馬雙雄高君濤、查維斯的“圍攻”，華將要脫穎而出不易。何華麟騎功未算最好，勝在多年熟悉環境，且圈中關係較佳，受馬主支持，座騎亦不愁寂寞。做騎師除騎功好，尚要有好馬出戰，否則識飛亦難贏。何華麟搏殺交到功課，戰駒飛到馬到，今季六W來自四個不同馬房，當中替張兆煊、馮耀正取兩W。謝貴全及劉志森各勝一場，其餘未有交易。劉志森上季倚重何華麟搏殺，騎練攜手炮製“聖靈之都”共取六W。何華麟無拈手其他駒，可見對“聖靈之都”情有獨鍾。

論賽績“聖靈之都”冇得頂，在澳八戰取六冠一亞，僅一次不入三甲，勝出率甚高，乃澳馬場近年難得的好馬。劉志森本地資深練者，養馬多年出過不少精英。“聖靈之都”屬近年代表作，上季“春季錦標”、“澳門打吡”及“澳門金盃”盡歸蹄下。周日重上征途，於第三場一、二班跑千五米。練者對此駒重新部署，馬匹休後已回氣，今番操好復爭首本路，續由何華麟主轡，人馬最佳拍檔。此駒排五檔亦好位，形勢依然有利。“聖靈之都”質新馬今季踏入全熟期，表現有進無退。此駒跟得鬥得，負重磅亦無懼，有力爭取新季首捷。